ഐ.പി.എൽ. ടീമായ റോയല്‍ ചലഞ്ചേഴ്സ് ബെംഗളൂരുവിന് (ആർസിബി) പിന്നാലെ രാജസ്ഥാന്‍ റോയല്‍സും (ആർആർ) വില്‍പനയ്ക്ക് വെച്ചതായി സൂചന. ലഖ്‌നൗ സൂപ്പർ ജയന്റ്‌സ് ഉടമ സഞ്ജീവ് ഗോയങ്കയുടെ ജ്യേഷ്ഠനും വ്യവസായിയുമായ ഹർഷ് ഗോയങ്കയുടെ സമൂഹ മാധ്യമമായ ‘എക്‌സി’ലെ (മുമ്പ് ട്വിറ്റർ) പോസ്റ്റാണ് ഈ അഭ്യൂഹങ്ങൾക്ക് തിരികൊളുത്തിയിരിക്കുന്നത്.തൻ്റെ അറിവിൽ നിലവിൽ രണ്ട് ഐ.പി.എൽ. ടീമുകളാണ് വിൽപനയ്ക്കുള്ളതെന്നും, അവ റോയൽ ചലഞ്ചേഴ്സ് ബെംഗളൂരുവും രാജസ്ഥാൻ റോയൽസുമാണ് എന്നും അദ്ദേഹം ‘എക്‌സി’ൽ കുറിച്ചു. ടീമുകളുടെ നിലവിലെ ഉയർന്ന ബ്രാൻഡ് മൂല്യം മുതലെടുക്കാൻ ഉടമകൾ ആഗ്രഹിക്കുന്നതിനാലാണ് ഈ നീക്കം നടക്കുന്നതെന്നും ഗോയങ്ക ചൂണ്ടിക്കാട്ടി.ടീമുകളെ ഏറ്റെടുക്കാൻ നാലോ അഞ്ചോ പേർ ഇതിനോടകം സന്നദ്ധത അറിയിച്ചിട്ടുണ്ട്. വാങ്ങാൻ താൽപര്യമുള്ളവർ പൂനെ, അഹമ്മദാബാദ്, മുംബൈ, ബെംഗളൂരു എന്നിവിടങ്ങളിൽ നിന്നുള്ളവരോ അതോ യുഎസ്എയിൽ നിന്നുള്ളവരാകുമോ എന്നും ഹർഷ് ഗോയങ്ക തൻ്റെ പോസ്റ്റിലൂടെ ആരാഞ്ഞു. ഗോയങ്കയുടെ ഈ പോസ്റ്റ് ഐപിഎൽ ലോകത്ത് വലിയ ചർച്ചാവിഷയമായിരിക്കുകയാണ്. ഔദ്യോഗിക പ്രതികരണങ്ങൾ ഒന്നും ഇതുവരെ പുറത്തുവന്നിട്ടില്ല.