ഇന്ത്യൻ പ്രീമിയർ ലീഗിൽ (ഐ.പി.എൽ.) രാജസ്ഥാൻ റോയൽസിൽ നിന്ന് ചെന്നൈ സൂപ്പർ കിംഗ്‌സിലേക്ക് മാറിയതിന് പിന്നാലെ നിർണായകമായ പുതിയ ദൗത്യം ഏറ്റെടുത്ത് മലയാളി താരം സഞ്ജു സാംസൺ. ബിസിസിഐയുടെ സയ്യിദ് മുഷ്താഖ് അലി ട്രോഫി 2025-26 സീസണിൽ കേരള സീനിയർ പുരുഷ ക്രിക്കറ്റ് ടീമിനെ നയിക്കാൻ സഞ്ജുവിനെ തിരഞ്ഞെടുത്തതായി കേരള ക്രിക്കറ്റ് അസോസിയേഷൻ (കെ.സി.എ) അറിയിച്ചു.

നവംബർ 26 മുതൽ ഡിസംബർ 8 വരെ ലഖ്‌നൗവിൽ നടക്കുന്ന ടൂർണമെന്റിലെ എലൈറ്റ് ഗ്രൂപ്പ്-എ ലീഗ് മത്സരങ്ങളിലാണ് സഞ്ജുവിന്റെ നേതൃത്വത്തിൽ കേരളം ഇറങ്ങുക. കഴിഞ്ഞ ഏഷ്യാ കപ്പിൽ കിരീടം നേടിയ ഇന്ത്യൻ ടീമിന്റെ ഭാഗമായിരുന്ന സഞ്ജു, 2026 ഐസിസി ടി20 ലോകകപ്പിന് മുന്നോടിയായി മികച്ച ഫോം നിലനിർത്താനുള്ള ഒരുക്കത്തിലാണ്.

മുൻ ഇന്ത്യൻ ബാറ്റർ അമയ് ഖുറാസിയ പരിശീലിപ്പിക്കുന്ന കേരള ടീമിൽ, മുംബൈ ഇന്ത്യൻസിൽ നിന്ന് അടുത്തിടെ ഒഴിവാക്കിയ വിഘ്‌നേഷ് പുത്തൂർ, മുഹമ്മദ് അസറുദ്ദീൻ എം., രോഹൻ എസ്. കുന്നുമ്മൽ എന്നിവരുൾപ്പെടെ പ്രമുഖ താരങ്ങളും ഉൾപ്പെടുന്നു.

ടൂർണമെന്റിനായുള്ള കേരള സ്‌ക്വാഡ് നവംബർ 22-ന് ഇൻഡോറിൽ നിന്ന് ലഖ്‌നൗവിലേക്ക് യാത്ര പുറപ്പെട്ടു. ഇന്ത്യൻ ക്രിക്കറ്റ് ലോകം ആകാംഷയോടെ കാത്തിരിക്കുന്ന ഈ ടൂർണമെന്റിൽ കേരള ടീമിന്റെ പ്രകടനം സഞ്ജുവിന്റെ ക്യാപ്റ്റൻസിക്ക് കീഴിൽ എങ്ങനെയായിരിക്കുമെന്നറിയാൻ ആരാധകർ കാത്തിരിക്കുകയാണ്.

കേരള സ്ക്വാഡ്: സഞ്ജു വി സാംസൺ (ക്യാപ്റ്റൻ, വിക്കറ്റ് കീപ്പർ), രോഹൻ എസ് കുന്നുമ്മൽ, മുഹമ്മദ് അസറുദ്ദീൻ എം (വിക്കറ്റ് കീപ്പർ), അഹമ്മദ് ഇമ്രാൻ (വൈസ് ക്യാപ്റ്റൻ), വിഷ്ണു വിനോദ് (വിക്കറ്റ് കീപ്പർ), നിധീഷ് എം.ഡി, ആസിഫ് കെ.എം, അഖിൽ സ്കറിയ, ബിജു നാരായണൻ എൻ., അങ്കിത് ശർമ്മ, കൃഷ്ണ ദേവൻ ആർ.ജെ, അബ്ദുൽ ബാസിത് പി.എ, ഷറഫുദ്ദീൻ എൻ.എം, സിബിൻ പി ഗിരീഷ്, കൃഷ്ണ പ്രസാദ്, സാലി വി സാംസൺ, വിഘ്‌നേഷ് പുത്തൂർ, സൽമാൻ നിസാർ.

പരിശീലക സംഘം: അമയ് ഖുറാസിയ (മുഖ്യ പരിശീലകൻ).