ഇന്ത്യൻ ക്രിക്കറ്റിനെ ഞെട്ടിച്ച് ദക്ഷിണാഫ്രിക്കയോട് സ്വന്തം മണ്ണിൽ ടെസ്റ്റ് പരമ്പരയിൽ (2-0) തോറ്റതിന് പിന്നാലെ, ഇന്ത്യൻ ഹെഡ് കോച്ച് ഗൗതം ഗംഭീറിൻ്റെ ഭാവി അനിശ്ചിതത്വത്തിൽ. പരമ്പരയിലെ ദയനീയ പ്രകടനത്തെ തുടർന്ന് വിമർശനങ്ങൾ ശക്തമായതോടെ തൻ്റെ ഭാവി ബി.സി.സി.ഐ (BCCI) തീരുമാനിക്കുമെന്ന് ഗംഭീർ വാർത്താ സമ്മേളനത്തിൽ വ്യക്തമാക്കി. ഇതോടെ കോച്ച് പദവിയിൽ നിന്ന് ഗംഭീർ രാജി വെക്കുമോ എന്ന ആകാംക്ഷയിലാണ് ക്രിക്കറ്റ് ലോകം.

ഇന്ത്യൻ ടെസ്റ്റ് ചരിത്രത്തിലെ ഏറ്റവും വലിയ തോൽവികളിലൊന്ന് ഏറ്റുവാങ്ങിയതിന് ശേഷമാണ് ഗംഭീർ മാധ്യമങ്ങളെ കണ്ടത്. 408 റൺസിൻ്റെ കനത്ത തോൽവിയാണ് ഗുവാഹത്തിയിൽ ദക്ഷിണാഫ്രിക്ക ഇന്ത്യക്ക് സമ്മാനിച്ചത്.

“കുറ്റം എൻ്റെ മേൽ തുടങ്ങുന്നു”

പരാജയത്തിൻ്റെ പൂർണ്ണ ഉത്തരവാദിത്തം ഏറ്റെടുത്ത ഗംഭീർ, കുറ്റസമ്മതത്തിനിടയിലും തൻ്റെ മുൻ വിജയങ്ങൾ ഓർമ്മിപ്പിക്കാൻ മറന്നില്ല. “ഈ പരാജയത്തിൽ കുറ്റം എല്ലാവർക്കുമുണ്ട്, അത് എന്നിൽ നിന്ന് തുടങ്ങുന്നു. ഞാനിപ്പോഴും ഉറച്ചു പറയുന്നു, ഇന്ത്യൻ ക്രിക്കറ്റാണ് പ്രധാനം, ഞാനല്ല.” അദ്ദേഹം പറഞ്ഞു.

എന്നാൽ, തനിക്കെതിരായ വിമർശനങ്ങൾ വർദ്ധിച്ചതോടെ, കഴിഞ്ഞ വർഷം ന്യൂസിലൻഡിനെതിരെ ഹോം പരമ്പര തോറ്റതും നിലവിലെ ദക്ഷിണാഫ്രിക്കൻ തോൽവിയും ചൂണ്ടിക്കാട്ടിയപ്പോൾ ഗംഭീർ വികാരാധീനനായി.

“ഞാനാണ് ഈ യുവ ടീമിനെ ഇംഗ്ലണ്ടിൽ മികച്ച പ്രകടനം കാഴ്ചവെക്കാൻ സഹായിച്ചത്. 2025-ലെ ചാമ്പ്യൻസ് ട്രോഫിയും ഏഷ്യാ കപ്പും നേടിയതും എൻ്റെ കീഴിലാണ്. നിങ്ങൾ അതെല്ലാം പെട്ടെന്ന് മറക്കും. എൻ്റെ ഭാവി തീരുമാനിക്കേണ്ടത് ബിസിസിഐ ആണ്. ഇന്ത്യൻ ക്രിക്കറ്റിന് വേണ്ടി മുന്നോട്ട് പോകാൻ ഞാൻ തയ്യാറാണ്”

– ഗൗതം ഗംഭീർ, ഇന്ത്യൻ ഹെഡ് കോച്ച്

ആരാധകരുടെ വിമർശനം:

തുടർച്ചയായ രണ്ടാം തവണയാണ് ഗംഭീറിൻ്റെ കീഴിൽ ഇന്ത്യ ഹോം ടെസ്റ്റ് പരമ്പരയിൽ പരാജയപ്പെടുന്നത്. കൂടാതെ ടെസ്റ്റ് ടീമിൽ ഓൾറൗണ്ടർമാർക്ക് അമിത പ്രാധാന്യം നൽകുന്നതിലുള്ള സെലക്ഷൻ രീതിയും വലിയ വിമർശനങ്ങൾക്ക് വഴിവെച്ചിട്ടുണ്ട്. ഓൾറൗണ്ടർമാർക്ക് പകരം, ടെസ്റ്റ് സ്പെഷ്യലിസ്റ്റുകളെ ടീമിൽ ഉൾപ്പെടുത്തണമെന്നും, റെഡ്-ബോൾ ക്രിക്കറ്റിനായി ഒരു പ്രത്യേക കോച്ച് വേണമെന്നും ആവശ്യമുയർന്നിട്ടുണ്ട്.

എന്തായാലും, ബിസിസിഐയുടെ നിർണ്ണായകമായ ഒരു തീരുമാനം ഉടൻ ഉണ്ടാകുമെന്നാണ് ക്രിക്കറ്റ് ലോകം പ്രതീക്ഷിക്കുന്നത്.